County: Bedfordshire
Code: D4120
Reference: Bedford, Bedfordshire and Luton Archives: TW572
Function: Lease




This endentour maid þ^e xxvj day of Decembr̕ in þ^e yere of kyng Edwarde iiij^te þe xi yere beres wittnes
þ^t damme Margarete Pikkerd Prioresser of Harwold w^t consent of alle hir Sustereȝ haithe grawnted
and to ferme lattyn to John Hardwike of þ^e parische of Sulbery in þ^e cownte of Bukyngham and to
Margarete his wiffe and þ^e hereȝ of þem alle þair Londys and tenamentes w^t alle maner of appurtenances
to þair said londis and tenementes in ony maner pertenyng . at þ^e day of makyng of þi^js presentȝ in
þair hondis beyng þ^t is to say in þ^e said Sulbery . holenden . lychcombe and Bragname to þ^e
ende of þe terme of thre score yere next folowyng þ^e date of þ^is present wrytyng . payng yerly
þerfor att two vsuelle termeȝ xiij se iiij d þ^t is to say att our lady day þ^e Annunciation̕ and of Michaelle-
messer w^t-owt long̕ delay . of said John and Margarete and þer hereȝ costeȝ to þ^e said prioresser and conuent
to be brought and payde or to þair successours . þ^e first day of payment begynyng att our lady day
þ^e annunciation̕ after þ^e date of þ^es wrytyng next comyng and if it happon̕ þ^e said rent of xiij se iiij^d
to be behynde att ony day dew to be payd by þ^e space of sex wekys . þan̕ it schalle be levfulle to
þ^e said prioresser and þ^e convent of harwold or to þair attourneys for reentre and to haue ayayn̕ alle þair
said londeȝ and tenementes w^t all þair appurtenauntȝ and w^t alle maner of gudeȝ þerin founden to tyme
þ^e said prioresser and þ^e convent be fully content and agreed of alle arrearageȝ and dewteȝ to þa̕ in ony
maner pertenyng . and alle maner of chargeȝ and costeȝ to þ^e said tenour pertenyng alle þ^e terme afor-
said þ^e said John and Margarete and þair hereȝ schalle opon þair own̕ costeȝ beld and make on
newe house of iij bayis w^t-in hir said tenement of Sulbery . and þ^e place sufficiently so belded
w^t alle or̕ reparacions in þ^e said tenement sufficiently repared þ^e said John and Margarete
and þair hereȝ in þ^e ende of þair termeȝ schalle wele and sufficiently so leve Jn wittnes herof
þ^e said John and Margarete his wiff to one parte of þ^is endentour w^t þ^e said prioresser and convent
remainyng haithe sett þair sealleȝ Gyffen̕ þ^e day and yere obow-wryten .