Lagar film om etiske utfordringar ved grøn omstilling

Kombinerer kunst og vitskap

Hans Baumann er ein sveitsisk-amerikansk kunstnar med base i Los Angeles. Bakgrunn har han frå landskapsarkitektur og design frå Harvard University Graduate School of Design.

Arbeida hans utforskar økologisk kollaps, dynamikken i klimaendringar og avkoloniseringa av amerikansk land.

Det er ikkje første gong Hans Baumann har eit forskingsopphald ved The Greenhouse. I 2022 hadde Baumann eit månadslangt opphald ved forskingssenteret, då som grøn omstillingsforskar, der han jobba med kortfilmen sin «Lithospheric Transference (Noreg)». Filmen vart vist på Norsk oljemuseum 17. november 2022. Opptaka til filmen gjorde Baumann i løpet av opphaldet sitt i Noreg. Her dokumenterte han omgivnader i og rundt Stavanger. Gjennom filmen ønskte han å understreka dei sosiale og kulturelle gjenstandane, institusjonane og handlingane som er gjorde mogleg gjennom utvinning av fossilt brensel i Noreg.

‒ Det innvilga Fulbright-stipendet er eit direkte produkt av gode samtaler og forbindelsar me fekk då han var her i tilknytting til det grøne omstillingsprogrammet hausten 2022, seier Finn Arne Jørgensen. Han leiar The Greenhouse saman med Dolly Jørgensen.

‒ Opphaldet ved The Greenhouse introduserte meg ikkje berre for eit utruleg sjenerøst og talentfullt akademisk fellesskap, det gav meg høvet til å gi mentorskap til studentar og plassera kunstpraksisen min i ein heilt ny kulturell kontekst. Fordi arbeidet mitt rundt klimaendringar og energiovergangar både er forskingsbasert og stadsspesifikk, fann eg at Stavanger, og Noreg generelt, var den perfekte staden for å utdjupa kompetansen min rundt energiomstillingar og katalysera vidare vekst i karrieren min som kunstnar, seier Baumann.

Fangar opp utfordringane med grøn omstilling

Tida og ressursane som er gitt av Fulbright-programmet ønskjer Baumann å bruka til å utvida omfanget av forskingsundersøkinga ved norsk energipraksis i Stavanger – hovudstaden i den nordiske oljeøkonomien.

Baumanns kunstnariske arbeid har vorte beskrive med at det fangar opp nyansane ved utfordringane innanfor grøn omstilling.
‒ Dette er utfordringar som både byen Stavanger og norsk oljeindustri står overfor, seier senterleiar Dolly Jørgensen, som sjølv har forska på oljeindustrien.

‒ Stipendet han har fått tildelt styrkar det sterke engasjementet The Greenhouse har for Artscience-forsking innan miljøhumaniora, seier senterleiarane.

På norsk kan omgrepet ‘ArtScience' omsetjast til ‘kunstvitskap' eller ‘kunstfagleg forsking'.

Artscience-feltet er kjent for å bringa saman kunstnarar, designarar, ingeniørar, forskarar og andre fagfolk for å samarbeida og skapa nye former for kunstnarisk og vitskapleg praksis ved å integrera ulike disiplinar på måtar som skaper ny innsikt og innovasjon.

Tekst: Kristin Vestrheim Cranner.