Fakultet for utdanningsvitskap og humaniora

Studietilbod

Me ynskjer at studentane som går ut frå oss skal vere godt trente i kritisk og analytisk tenking, ha evne til etisk refleksjon og vere bevisste på behovet for kontinuerleg læring og profesjonsfagleg utvikling.

Ei viktig sak for fakultetet sitt samfunnsoppdrag er moglegheita som ligg i samarbeidet med praksisfeltet. Det gode samarbeidet me har med skule og barnehage står som ein av fleire sentrale føresetnader for eit kontinuerleg arbeid med kvalitet i lærarutdanningane våre. UiS er ein partnar for skuler og barnehagar i Rogaland og elles i landet gjennom desentralisert ordning for kompetanseutvikling i grunnskulen og regional ordning for kompetanseutvikling i barnehagar.

Fakultetet har óg etablert utvida partnerskap med utvalde universitetsskuler og universitetsbarnehagar i regionen med mål om å styrke mellom anna praksisopplæringa.

• Våre årsstudier, bachelor- og masterprogram
• Forskarutdanning/ph.d.-program ved fakultetet
• Etter- og vidareutdanning for tilsette i skule, barnehage og PPT

Forsking

Me forskar på fagområde som pedagogikk, fagdidaktikk og spesialpedagogikk, lesing, læringsmiljø og -psykologi, matematikk, språk og litteratur, historie og miljøhistorie, religion, mangfold og kultur.

Forskingsmiljøa våre samarbeider tett med praksisfeltet, særleg skule og barnehage, og bidreg til utvikling av både grunnforsking og samfunnsnyttig kunnskap. VI samarbeider óg med verksemder og praksisfelt om offentleg ph.d og nærings-ph.d.

Vårt ph.d.-program i utdanningsvitskap og humaniora, har om lag hundre kandidatar. Vi samarbeider med fleire nasjonale forskarskuler som tilbyr relevant nettverk. Nasjonal forskarskule for miljøhumaniora (NoRS-EH) blir leia av forskingssenteret Greenhouse.

På fakultetet har me fem forskings- og kompetansesenter. Med Nasjonalt senter for læringsmiljø og atferdsforsking (Læringsmiljøsenteret), Nasjonalt senter for leseopplæring og leseforsking (Nasjonalt lesesenter), Filiorum – senter for barnehageforsking og Kunnskapssenter for utdanning er UiS eit nasjonalt nav innan utdanningsforsking. Greenhouse- senter for miljøhumaniora har landets største forskingsmiljø innanfor sitt felt.

I tillegg til våre strategiske programområde som du kan lese om nedanfor kan du lese meir om forskinga og forskargrupper på det enkelte institutt og senter sine nettsider.

Ved å trekke på forskingsmiljøa ved fakultetet styrkar me utdanningane og gjennom det studentane.

I tillegg til våre eigne senter, er fakultetet også del i Senter for spesialpedagogisk forskning og inkludering (SpedAims), ei langsiktig satsing som skal styrke den spesialpedagogiske forskninga i Noreg og NORBARN, Noregs første forskarskule retta mot barnehagesektoren.