UiS fornyar avtalen med Norway Summit

Norway Summit er ein årleg næringslivskonferanse i Stavanger, og ein del av den prestisjetunge sjakkturneringa Norway Chess. Konferansen fokuserer på temaa teknologi, finans, innovasjon og bærekraft. Det er ein møteplass for tenkarar frå både akademia og næringslivet, og eit stort trekkplaster for regionen.

Som ein del av den fornya avtalen så vil Handelshøgskolen ved UiS halde fram med samarbeidet med Norway Summit.

– At Norway Summit tiltrekkar seg leiande tenkarar kjem universitetet og våre studentar til gode. Temaa er alltid superaktuelle, og er i det viktige grensesnittet mellom økonomi, teknologi og bærekraft. Me ser fram til å vidareutvikle vårt gode samarbeid, seier dekan ved Handelshøgskolen ved UiS, Ola Kvaløy.

Dyktige fagfolk frå UiS

Samarbeidet med Handelshøgskolen og UiS har vore sterkt frå begynninga, forklarer dagleg leiar ved Norway Summit, Benedicte Westre Skog:

– Universitetet har konsekvent anbefalt dyktige enkeltpersonar som har bidratt betydeleg til konferanseprogrammet. Det er også viktig for oss å ha ein sterk akademisk partnar når me diskuterer framtidige utviklingar, og Norway Summit har som mål å skape ein plattform for akademia og næringslivet for å utveksle idear og samarbeide om vegen vidare.

Norway Summit 2023 skjer 1. juni. Konferansen har fått namnet: «The Next Move». Følg med vidare for annonsering av program og foredragshaldarar.

Det er også aktuelt og interessant for alle studentar, som blir oppfordra til å delta. Norway Summit har gode studentprisar på billettane.