– Eg skulle gjerne hatt meir av denne type undervising

Ei undersøking gjennomført av den danske fagforeininga DJØF har analysert meir enn 270 000 jobbannonser retta mot juristar, økonomar og kommunikasjonsmedarbeidarar. Dei fann ut at etterspurnaden etter «mjuke verdiar» som samarbeidsevne, empati og sosiale ferdigheitar har stige med ca. 20 prosent dei siste ti åra.

– Me må dermed førebu våre studentar for arbeidslivet og gje dei nødvendige verktøy til å kunne lykkast i ein framtidig arbeidsmarknad, seier Lana Bubalo som er avdelingsleiar for regnskap og rettsvitenskap på Handelshøgskolen ved UiS.

Og ved hjelp av finansierte midlar frå UiS fekk Handelshøgskolen ved UiS på plass prosjektet «Soft Skills» i studieåret 2021/2022 for å hjelpe studentar med å oppnå nettopp desse ferdigheitane.

Gjevande med eit anna fokus

Sebastian Voith studerer bachelor i rettsvitenskap og var ein av 45 studentar som deltok på prosjektet. Noko av det viktigaste han lærte var bruken av eit presist og konsist språk, eit bodskap han tok med seg vidare i oppgåveskriving og eksamen.

– Eg synest soft skills har vore spennande å motiverande å vere med på. Det er ikkje mogleg å komme unna at det er veldig mykje lesing på rettsvitenskap, og det å få bryte dette opp med eit litt anna fokus har vore veldig gjevande. Ein føles at Handelshøgskolen verkeleg har satsa på eit godt studietilbod for oss, seier Voith som også trekk frem at dei har hatt veldig gode førelesarar.

Som eit ledd i prosjektet var det også organisert ein regional prosedyrekonkurranse, og sett opp forskingsgrupper. Hensikten med prosedyrekonkurransen var å trene seg på rollen som advokat i ein rettsak og utvikle evnen til å bygge opp juridisk argumentasjon i praksis, altså heilt i tråd med soft-skills prosjektet.

Sosialt opplegg

Ein annan viktig del av prosjektet var å legge til rette for at studentane endeleg kunne vere meir sosiale etter koronapandemien, og ha moglegheit til å bli kjent på tvers av kull. Dette var eit ekstra pluss for Voith.

– Det å få møte fleire andre studentar også frå andre årstrinn synest eg var veldig bra. Eg er litt eldre sjølv, så det å få fleire kontakter sett eg pris på.

Kva har det å seie for deg vidare i studietida og i vidare karriere at du har denne erfaringa?

– Det handler nok primært om ei bevisstgjering om diverse tema som kan omhandle jobben i eit seinare arbeidsliv. Eg skulle gjerne hatt meir av denne type undervising, seier Voith.