Sara tar ein bachelor rettsvitskap og er spesielt interessert i internasjonal jus

Sara Beitz tar ein bachelorgrad i rettsvitskap på Handelshøgskolen ved UiS. For tida er ho også leiar for StudentOrganisasjonen StOr.

Kvifor valde du å studere rettsvitskap?

Eg bestemte meg tidleg for at eg ønska å studere rettsvitskap. Eg er veldig glad i språk og rammeverk, og var interessert i å lære meir om rettssystemet. Eg deltok i ei «rett og galt»-veke på ungdomsskulen, som var ein del av karriererettleiinga. Her fekk klassen min prøve seg i ein liksom-rettsak i ei veke. Eg fekk rolla som aktor saman med to med-elevar, og blei gjennom dette prosjektet sikker på at rettsvitskap var noko for meg. Eg er spesielt interessert i internasjonal jus, men held alle moglegheiter opne.

Kvifor valde du Universitetet i Stavanger og Handelshøgskolen ved UiS?

Først og fremst ønska eg å komme meg eit stykke bort frå heimbyen min for å verkeleg oppleve studenttilværelsen, og til ein by der eg ikkje kjente så mange. Vidare var eg interessert i det internasjonale miljøet på UiS og i Stavanger.

Korleis ser ein typisk studentkvardag ut for deg?

Studiekvardagen min er variert. Eg er på campus nesten kvar dag for å lese og gå i førelesing. Eg avsluttar som regel dagen med gruppearbeid eller lesing. Rettsvitskap har ingen obligatorisk undervising og er derfor fleksibelt.

Ein vanleg studiekvardag varer om lag åtte timar før eg reiser heim og lagar middag. Eg er veldig glad i å lage mat, og det er derfor viktig for meg å ha god nok råd til å kjøpe gode matvarar. Eg har hatt ulike deltidsjobbar og betalte verv ved sidan av studia. Likevel er eg opptatt av at eg skal ha tid til å vere student på fulltid, og jobbar derfor berre nokre timar i veka.

På ettermiddagen jobbar eg med verv, er med vener heime, i byen, eller på studentbaren Tappetårnet. Med eit fleksibelt studieløp får eg tid til det eg ønsker på fritida. Eg trener, pleiar hobbyar, inviterar til middagsselskap, går på festar og engasjerer meg. Det er noko av det beste med studielivet!

For tida har eg permisjon frå studieprogrammet fordi eg jobbar som studentleiar StOr på UiS. Eg vart først engasjert i studentorganisasjonen gjennom kontroll- og kvalitetskomiteen, som er eit lite verv med stor relevans for rettsvitskap. Her fekk eg prøve meg på tolking og utvikling av vedtekter i praksis for ein ekte organisasjon. Eg fann arbeidet i studentorganisasjonen svært gjevande og interessant, og valde å søke nye fulltidsverv.

Har du eit minne eller noko du hugsar ekstra godt frå studietida til nå?

Mitt første år på UiS blei eg god ven med ein gjeng utvekslingsstudentar frå Kenya. Dei inviterte meg heim til deiras studentbustad, der dei laga autentisk kenyansk mat til meg. Det var svært spennande å bli kjent med ein framand kultur og å lære dei om norsk kultur. Eg tok dei med meg til Dalsnuten og heile vegen spurte dei om den norske naturen og historien, og då me kom på toppen viste dei meg deiras ulike stammedansar! Det er eit utruleg flott minne.

Eg set enormt pris på det internasjonale miljøet på campus, og alt det har gitt meg. Dette er berre ein av mange historiar eg har med internasjonale studentar. Det einaste som er kjipt er at dei gjerne reiser heim ein gong.

Har du nokre råd for framtidige studentar på rettsvitskap?

Rettsvitskap krev dedikasjon og fordjupning i pensum. For mange kan det bli kjedeleg med ein einsformig måte å lære eit stoff. Eg synest derfor det er nyttig å oppsøke andre måter å lære om rettssystemer samtidig som eg studerer. Eg høyrer for eksempel på podkastar og følger med på rettssaker.

Vidare vil eg oppfordre alle studentar til å engasjere seg utanfor studia. Det gir relevant erfaring og er nyttig på CVen, samtidig som det er fint å ta del i studentmiljøet. Det gjer studietida litt lettare når ein har eit stort nettverk med vener, også frå andre studieprogram. Det å diskutere tverrffaglege tema med vener frå andre studieprogram har gitt meg ein større kjærleik for faget mitt.

Les også:

• Guro fikk ein forsmak på arbeidslivet i Stavanger tingrett
• Ja til master i rettsvitskap ved UiS!
• Jus-studentane fekk eit meir praktisk-orientert studieår med «Soft Skills»