– Dette er ein utmerka prestasjon av våre studentar

– Dette kjennest uverkeleg. Me hadde ikkje forventa å gå vidare til finalen, så det var ei stor overrasking då me fann ut at me vart valt blant 220 lag. Me er litt nervøse, men også veldig spente på å presentere bidraget vårt i finalen til DMC.

Det seier studentane Vladyslava Bakhno, Jane Felia og Jade Cavalcanti. Dei har blitt ein av to finalistar i konkurransen Digital Marketing Competition (DMC). Dette er ei internasjonal hending arrangert av Purdue University Northwest's College of Business, som gir bachelor- og masterstudentar ei unik moglegheit til å kunne pitche til verkelege kundar.

Ville utfordre seg sjølv

Dei møttest gjennom masterstudiet i økonomi og administrasjon på Handelshøgskolen ved UiS, og fann ut allereie førre semester kor godt dei jobba saman som ei gruppe.

– Me blei ivrige etter å prøve noko annleis der me kunne bruke kunnskapen vår om marknadsføring i praksis, og utvikle vår kompetanse. Derfor leita me etter internasjonale marknadsføringskonkurransar, og bestemte oss for å utfordre oss sjølv gjennom å delta i DMC 2022.

Dei skal presentere sin digitale marknadsføringsstrategi for MegMade - eit Chicago-basert møbelselskap, direkte under finalen, til kundens leiargruppe og aktive fagfolk innan marknadsføring.

Stor anerkjenning

Elham Ghazimatin, som er postdoktor på innstegsvilkår og underviser marknadsføring til studentane i faget Digital Marketing, har støtta dei gjennom heile prosessen.

– Dei har oppnådd noko veldig stort! Dette er ein utmerka prestasjon av våre masterstudentar og ei stor anerkjenning av kvaliteten til studentane våre på internasjonalt nivå, seier Ghazimatin.

Sjølv trur studentane at dei har kome så langt på grunn av den detaljerte analysen og den digitale marknadssføringstrategien dei gav kunden.

– Våre anbefalingar er basert på teori, primære og sekundære data. I tillegg kom vår ulike bakgrunn til nytte. Jade er mest kjend med digitale marknadsføringsstrategiar og analysar, Jane er meir fokusert på forbruker-, marknads,- og konkurrentanalysar, og Vladyslava har meir erfaring med e-handel og digitale kampanjar. Kort sagt, våre varierte ferdigheitar, kunnskapar og gode samarbeid har hjelpt oss til å oppnå finalistposisjonen.

Finalen vil foregå 2. desember.